No e schöne Dubel

Rolli: Du?
Dudel: Hä?

R: Jo solli, bisch au no umme?
D: Nai, i chumm erscht no.
R: He, du schwätzisch emol e Saich, also weisch.
D: Hejo, wenn du mi e so blöd frogsch.
R: I ha nit gfrogt, numme gmeint un meine
wird me jo no dürfe?
D: Jo, säll isch au wieder wohr.Was hesch gmeint?
R: Äh, jo, i ha d'r sage wölle, ass de Karli no e schöne Dubel isch.
D: Des isch nüt neu's, de hän sie jo in
d'Chlapsi gschteckt.
R: Aber nit lang.
D: Was, isch de ement scho wieder use?
R: Hejojo, grad gescht han i mit'm
gschwätzt.
D: Was het er verzellt?Wie gohts ihm so?
R: Schiens guet.Er het mirverzellt, asser noch dere psychiatrische Behandlig nümme igbildet, überheblig un arrogant sig.
D: Jowas, in dere churze Zit hän die dem si Hirni eso gwösche? De isch doch
ammel e sone saumäßige Matscho gsi,
richtig gruusig für d'Mitmänsche, gäll?
R: Jo, bsunders für die wiiblige.Jetzte sig er andersch, het er gsait.
D: Du meinsch nit öbbe ganz andersch?
R: Doch, hejo.Er het verzellt, er wüßti
sither, asses chei nättere bischiedenere
zruckhaltigere Kärli git, als wie ihn.Dorum wirkt jetzt chei Maa e so uf d' Fraue, wie er.
D: Ahsoo, äh, jo gopferdelli, do siehsch
wieder emol, was me in de Chlapsi us some Dubel no alles use hole cha, hä?
R: Genau, un du los, toleranter isch de
sither au gworde.
D: De? Wie wotsch no säll wüße, woner immer alles e so agzwiiflet un in Grund un Bode chritisiert het?
R: He, er het m'r doch no verzellt, er
heigi an's Färnseh gschriebe, e ganz e früündlige Zueschauerbrief.
D: Ah, hejo, dört cha sich e jede au zuem Programm üssere, hä? D'Naturfilm hän dem ammel jo scho immer esooo guet gfalle.Viellicht het er dene emol merci
gsait, für d'letschti Serie über de Rägewald?
R: Nai, des nit, aber er het mi's Chonzäpt läse lo un mini Meinig wüsse wölle.
D: Über was?
R: He, über d'Färnsehmeterologie.
D: Was, über was? Du, i glaub, dem müen sie aber gwaltig under de Frisur putzt ha? Was isch denno in sällem Chonzäpt gschtande?
R: Jo, halt numme, asser mit dere letschte Wättervorhersagerei nit zfriede gsi sig, obwohl de Chachelmaa
eigentlig sunscht e nätte Maa sig un öb'r sich vielicht dra intressiere dät, zuem emol erfahre, daß er die letschti ganzi Nacht do demit verbrocht het, die vom Chachelmaa vorusgsaiti "liichti Bewölkig" us sinem Chäller z'pumpe.
D: Un, isch scho e Antwort uf sine Brief zruck cho?
R: Jo, i glaub scho, wil er verzellt het, wo de Briefträger am Gartehag gschtande sig, do heig sälle gruefe, asser ruijg ufhöre chönnti e so blöd zuem bälle, wil emol chei Rächnig debi gsi sig.
D: Henai, des isch aber au no e schöne Dubel!