Uf die paar Bierli

(Kommentare: 0)

Uf die paar Bierli

Du, los Gisela,
jetzt loß mi goh,
i ha dir's schomol gsait,
i blieb no do.
He, was isch scho debi?
Nä-ä,i chumm nit mit.
Nai, nai, was hesch denn au?

'S isch garnüt gsi,
mit dere Frau ufem Maskeball.
Du bildisch dir
des numme alles i.
Die Ifersucht vo dir,
sie isch scho kollosal
un au dini Fantasie,
grad wie anegmolt.

Die blüejt ement,
schier scho 's ganzi Johr.
Nai, des isch sie nit,
sälli mit em lange Chleid.
Jo,'s isch doch verdelli wohr,
nai, au nit die,
mit de schöne, schwarze Hoor!

Was, des hesch jetzt aber gsait!
Jo, jo, vo mir us,toll.
Du chasch doch schomol goh,
wenn de's ums Verrecke wottsch.
Uf die paar Bierli
chunnt's mir nit a.
I blieb no e Rung im Ecke
un do an dere Theki schtoh.

De Danz isch ebe us.
Jo Solli Churt!
Bisch au no umme?
Gäll, 's goht d'r guet?
Ah so, du muesch di no
am letschte Gläsli hebe.
Git's öbbis neu's?
E Zoris hesch,
mit dinere Frau?

Jo was, sag numme?
I mit minere au.
Henai, dini isch furt?
Denno bisch doch froh,
hesch e so dini Rueh.
Viellicht isch sie au
scho längscht im Bett,
deheim oder sunscht neume,
wie bi de letschte Narrezit.

Jo, jo, i wett dezue,
die isch, du wirsch's erläbe,
nochem Äschemittwuch wieder do.
Druf wämmer eine hebe.
Proscht zämme!
Un denno - wer zahlt?
Mini Frau isch au scho gange.
Debi isch de Obe no nit alt,
het jo erscht emol agfange.

Was, du hesch mini Frau ebe no gseh?
in dere Beiz, dört näbedra?
Das nit ällei, ja so
un denno im Arm vome andere Maa?
Nai, des isch mir nit egal.
Weisch was, i ha
e paar letschti Schtützli do.
Die versufe mir au no,
im nächschte Schtammlokal
un lache is e Maidli a.

Mir sin doch no lang nit blau.
Was hesch gsait?
De weisch's nümme e so genau?
Hejo, bi dere Bierfahne.
Jenu, i gang.
Jetzt isch er furt, de Triebel.
He, wo rennsch no ane?
Jessesnai, er isch im Schpiegel!
Dört use luegt de Churt mi a!

Halt emol, sälle Maa,
de alti Dotsch bi jo i
un's Gisela schtoht näbedra,
isch zue m'r zruckcho!
Daß i di ha,
do bi i doch no froh.
Henai,un zahlt hesch au scho?
So isch halt mini liebi Frau,
mi Augeschtärn un wacht uf mi.
I weiß des ganz genau.

Gisela, du dänksch für zwoi,
nit numme ällei an di,
un hesch mi trotzdem gärn.
Wenn i mängmol bsoffe bi
un ammel no so blau,
de gröschti Saich abloß,
blibsch numme du für mi,
mi Schatz un allerbeschti Frau.
I sag's dir gli,
noch dere Fasnacht, des isch wohr,
loß i 's Sufe si.

Gisela, du wirsch's scho seh
un bruchsch nit lache.
Was, i ha dir des im letschte Johr,
an de Fasnacht au verschproche?

Do fallt mir grad öbbis i:

An de nächschte Fasnacht sufsch du mit.
Denno bi i numme halber voll
un du no nit.
Uf die paar Bierli chunnt's nit a.

Proscht Gisela!

« Zurück

Einen Kommentar schreiben